என்ன இது... தலைவர் அமெரிக்காவிலிருந்து வந்து 5 நாட்களாகிவிட்டது. அவர் வரும் வரை ஓயாமல் அவரைப் பற்றிய செய்திகளே பத்திரிகைகளை ஆக்கிரமித்துக் கொண்டிருந்தன. வந்த பிறகு அமைதியாகிவிட்டார்களே... என்று பலர் நேரிலும் இமெயிலிலும் தொலைபேசியிலும் கேட்ட வண்ணமுள்ளனர்.

தலை இருக்க வால் ஆடக்கூடாது என்பார்கள் அல்லவா... அப்படித்தான். நம்ம தலை இப்போது தலைநகரில் இருக்கிறார். அடுத்து செய்யப் போவது எதுவாக இருந்தாலும் இனி அவரே நேரடியாக அறிவிப்பார் என்பதால்தான் இந்த அமைதி.

இருந்தாலும், இன்றைய நிலை, என்ன நடந்து கொண்டிருக்கிறது என்பது குறித்து தலைவருக்கு நெருக்கமான அவரது உறவினர் ஒருவர் மூலம் நமக்குக் கிடைத்த தகவல்களின் ஒரு தொகுப்பு இது:

தனது அடுத்த நடவடிக்கை குறித்து வந்த அனைத்து தகவல்களையும் ஏற்கெனவே தெரிந்து வைத்திருந்த சூப்பர் ஸ்டார், அதுகுறித்து விவாதிக்க ஒரு ஆலோசனைக் கூட்டத்துக்கு ஏற்பாடு செய்திருந்தார்.

நேற்று மாலை தலைவரின் போயஸ் கார்டன் இல்லத்தில் இந்தக் கூட்டத்தில் ரஜினிக்கு மிக நெருங்கிய நண்பர்கள் மற்றும் உறவினர்கள் சிலர் மட்டுமே கலந்து கொண்டனர்.

சௌந்தர்யா ரஜினிகாந்த் மற்றும் தளபதி சத்தியநாராயணாவும் பங்கேற்றனர்.

இன்றைய அரசியல், குசேலன் பிரச்சினைகள், ரசிகர்களின் இன்றைய மனநிலை என பல்வேறு விஷயங்கள் குறித்து அலசிய ரஜினி, சரி... ரசிகர்களுக்கு இப்போ என்ன செய்யணும்னு எதிர்பார்க்கிறீங்க... எந்த முடுவு எடுப்பதாக இருந்தாலும், அதற்கு இது சரியான நேரம்தானா என்பதை நீங்களே சொல்லுங்கள் என கேட்டுவிட்டு, அமைதியாக அனைவர் முகததையும் பார்க்க யாருக்கும் ஒன்றும் பேசத் தோன்றவில்லையாம்.

பின்னர் பேசிய தலைவர், நான் ஒரு திட்டம் வைத்திருக்கிறேன். இது சரிப்படுமா என்று மட்டும் கூறுங்கள் எனக் கேட்டுவிட்டு தனது திட்டத்தைச் சொல்லியிருக்கிறார். நம்மிடம் பேசிய நண்பர் அதற்கு மேல் எதையும் சொல்லமுடியாது என்று உறுதியாகக் கூறிவிட்டதால் அத்துடன் விட்டுவிட்டோம்.

இந்தக் கூட்டத்துக்குப் பின் வீட்டில் நடந்த விருந்திலும், தனது ரசிகர்களின் இன்றைய மனநிலை குறித்துதான் ரஜினி அதிகம் பேசியுள்ளார்.

இதற்குப் பிறகுதான் சத்தியநாராயணா ரசிகர்களிடம் தலைவருடனான சந்திப்பு குறித்த அறிவிப்பை வெளியிட்டார்.

அப்படியெனில், ரசிகர்களுக்கு அக்டோபர் 3-ம் தேதி வருமாறு கடிதங்கள் அனுப்பப்பட்டதாகக் கூறப்பட்டதே, என்ற கேள்வி எழக் கூடும்.

அவர்களுக்கு முன்கூட்டியே தகவல் தெரிவிக்கத்தான் நேற்றே சத்தி இந்த அறிவிப்பை வெளியிட்டாராம்.

அக்டோபர் 12-ம் தேதி தலைவருடனான சந்திப்புக்கான தேதியை நிச்சயம் கூறுகிறேன் என்று சத்தி அனைத்து மாவட்ட நிர்வாகிகளுக்கும் உறுதியளித்துள்ளராம்.

தலைவரின் திட்டம் என்ன என்பது குறித்து தகவல் தெரிந்து கொள்ள நம்மாலான பல முயற்சிகளை மேற்கொண்டுள்ளோம்.

இன்னும் ஓரிரு தினங்களில் அதுபற்றிய சிறப்புக் கட்டுரையை எதிர்பாருங்கள்!

Sanganathan