இந்த சாதா வெற்றிக்கே இத்தனை ஆர்ப்பாட்டமா...!
முதலிலேயே சொல்லி விடுகிறோம்.... கமல்ஹாசனைத் திட்டுவதல்ல நமது நோக்கம். அவரது படம் தசாவதாரம் 100 நாள் இலக்கைத் தொட்டுவிட்டதே என்ற பொறாமையும் நமக்கில்லை.
காரணம் 100 நாள் கொண்டாட்டங்கள் நமக்கு அடிக்கடி வருபவை. கமல் படங்களுக்கு அரிதாக வருபவை!
ஆனால் இந்த தசாவதாரத்தை நமது தலைவரின் சிவாஜியை விட மிகப் பெரிய படமாகச் சித்தரிக்க அதன் தயாரிப்பாளர் ‘ஏஸ்கர்’ (அதானே இப்ப அவர் அடைமொழி?) ரவிச்சந்திரன் செய்த தகிடுதத்தங்கள், மலிவான விளம்பர உத்திகளைப் பார்த்துவிட்டதால், சில உண்மைகளைப் பகிர்ந்து கொள்ளவே இதை எழுதுகிறோம்.
இந்த ரவிச்சந்திரனை சாதாரணமாக எடைபோட வேண்டாம்... ‘மனிதருள் விஷம்’ என்ற அடைமொழிக்கு முற்றிலும் பொருத்தமான நபர். தலைவரின் சந்திரமுகி ஓடிய ஓட்டம் பார்த்து பொறாமையில் வெந்து வெதும்பி, சத்யம் மேலாளரிடம் இப்படிச் சொல்லியிருக்கிறார்:
என்னய்யா... அந்தாளு படத்தை இப்படி தாங்கிப் பிடிக்கிறீங்க... தூக்கி வீசிட்டு யூத்புல்லா நம்ம அந்நியனை ரிலீஸ் பண்ணுங்கப்பா...
அதற்கு சத்யம் மேலாளர்: அதெப்படி சார் முடியும்... நல்ல கலெக்ஷனுடன் 100 நாளைத் தாண்டி ஓடிக்கிட்டிருக்கு (சத்யத்தில் மட்டுமே 2 தியேட்டர்களில்!). அப்படியெல்லாம் தூக்க முடியாது சார்...
ரவிச்சந்திரன் மேலும் உபயோகித்த சில வார்த்தைகளை இங்கே பிரயோகித்தால் ‘உதைக்க வேண்டாமா இந்தாளை?’ என்று நம் தலைவர் பாணியில் கிளம்பி விடுவீர்கள்!
சரி மேட்டருக்கு வருவோம்...
ஒரு பெரிய இடைவெளிக்குப் பிறகு கமல்ஹாசன் நடித்த ஒரு படம் 100 நாள் இலக்கைத் தொட்டிருக்கிறதென்றால் அது தசாவதாரம்தான். தன் நடிப்பு புகழப்பட்டாலும் வர்த்தக ரீதியாக தனக்கு எப்போதும் இழப்புகள் ஏற்படுவது ஏன் என கமல் அடிக்கடி கேள்வி எழுப்புவார் பத்திரிகையாளர்களிடம்.
ஆளவந்தானுக்குப் பிந்தைய கமல் படங்களில் ஹேராம், விருமாண்டி போன்றவை பேசப்பட்டாலும் வர்த்தக ரீதியாக பெரும் பின்னடைவையே அவருக்குத் தந்தன.
பம்மல் கே சம்பந்தம், பஞ்சதந்திரம், வசூல் ராஜா, மும்பை எக்ஸ்பிரஸ் போன்றவை சராசரிப் படங்களாகவே அமைந்துவிட்டன. இந்த நிலையில் அவருக்கு ஓரளவு கைகொடுத்த படம் வேட்டையாடு விளையாடு மட்டும்தான். அதுகூட இரண்டு ஆண்டுகளுக்கு முன் வெளியானது.
எனவே தனக்கு பிளாக் பஸ்டர் என்று சொல்லும் வகையில் ஒரு படம் அமைய வேண்டும் என்ற வெறியுடன் கமல் தசாவதாரத்தை உருவாக்கினார். 10 வேடங்களில் நடித்திருந்தார் கமல் இந்தப் படத்தில்.
இந்தப் படம் குறித்து பலவித விமர்சனங்கள் எழுந்தன. படத்தின் குறைகளை கமல்ஹாசனே ஒப்புக் கொண்டு பேட்டியும் அளித்தார்.
ஆனாலும் வசூல் ரீதியாக அந்தக் குறைகளை மறக்கடித்துவிட்டது தசாவதாரம்.
இன்று அந்தப் படத்தின் 100-வது நாள் விழா. ரஜினி ரசிகர்களான நாமும் வாழ்த்துவோம்.
ஆனால்...
இந்தப் படம் சிவாஜியை மிஞ்சி சாதனை செய்துவிட்டதாக ரவிச்சந்திரனும் அவரது எடுபிடிகளான சிலரும் பரப்பி வரும் பொய்களை அப்படியே விட்டுவிட மனசில்லை. காரணம் உண்மை நிலை வேறு.
இதுவரை நம் தலைவரின் சிவாஜி வசூல் சாதனையை முறியடிக்க எந்தப் படத்தாலும் முடியவில்லை. அதை இன்னொரு சூப்பர் ஸ்டார் படத்தால் மட்டுமே முறியடிக்க முடியும் என்பது இந்தியத் திரையுலகுக்கே தெரியும்.
பிரமாண்டத்திலும் சரி, வசூலிலும் சரி... உள்ளத்தைக் கொள்ளை கொள்ளும் பொழுது போக்கு அம்சங்களிலும் சரி... நம்ம தலைவரின் சிவாஜி உலகத்தரமான திரைப்படம்.
சிவாஜி – தசாவதாரம் சில உண்மைகளைப் பார்ப்போம்:
சென்னையில் மட்டும் 6 திரையரங்குகளில் தாசாவதசாரம் 100 நாட்களைத் தாண்டி ஓடிக் கொண்டிருக்கிறது (அதிலும் பெரும்பாலும் ஒரு காட்சிதான், ஆனால் 4 காட்சி என பொய் சொல்லுகிறது போஸ்டர் விளம்பரம்!). சென்னைக்கு வெளியே மாயாஜாலில் ஒரு காட்சியாக 100-வது நாளை எட்டிப் பிடித்துள்ளது.
ஆனால் நூறாவது நாள் விளம்பரத்தில் செகண்ட் ரிலீஸ் செய்யப்பட்ட திருவள்ளூர், கும்முடிப்பூண்டி தியேட்டர்களையும் சேர்த்துக் கொண்டிருப்பது, அப்பட்டமான டி.ராஜேந்தர்தனம்!
மற்றபடி பல ஊர்களில், நகரங்களில் 25-வது நாளோடு தூக்கப்பட்ட படம்தான் தசாவதாரம்.
ரஜினி போட்டுக் கொடுத்த ரூட்டு!
ரவிச்சந்திரனுக்கு சொந்த சரக்கு கிடையாது. தன் படத்தை அவர் மார்க்கெட்டிங் செய்வதிலிருந்து ரிலீஸ் செய்வது வரை அனைத்துக்கும் சிவாஜியைத்தான் காப்பியடித்தார். அதிக தியேட்டர்களில் ரிலீஸ் செய்து சீக்கிரம் லாபம் பார்க்கும் முறையை தலைவரின் ‘சிவாஜி’தான் தமிழ் திரையுலகில் அறிமுகம் செய்தது.
இன்னொன்று, முத்து, படையப்பா, சந்திரமுகி, சிவாஜிக்குப் பிறகுதான் இங்கே உள்ளவர்களுக்கு வெளிநாட்டு மார்க்கெட் இடம் கொடுத்தது. அதற்கு முன்புவரை தமிழ்ப் படங்கள் எங்கோ ஒரு தியேட்டரில் ஓரிரு நாட்கள் ஓடிவிட்டு மறைந்துவிடும். ஆனால் தலைவரின் முத்து படம் தொடங்கி குசேலன் வரை வெளிநாட்டில் திருவிழாக் கூட்டத்துடன் வசூல் சாதனை புரிந்து வருகின்றன.
வெளிநாட்டு ரசிகர்களைப் பொருத்தவரை ரஜினிதான் இன்று இந்திய திரைப் படங்களின் முகம். தமிழ்த் திரைப்படங்கள் இன்றைக்கு வெளிநாடுகளில் ஓரளவுக்காவது ஓடக் காரணம் ரஜினி என்ற சூப்பர்ஸ்டார்தான்.
கமலுக்கு இப்போது வெளிநாடுகளில் கிடைத்துள்ள அங்கீகாரம் அல்லது அவர் படம் இன்றைக்கு இத்தனை பெரிய அளவில் வெளிநாடுகளில் ரிலீசாகக் காரணமும் ரஜினி படங்கள் தொடர்ந்து பெறும் வெற்றிகள்தான். இதை கமல் ரசிகர்களாலும்கூட மறுக்க முடியாது.
கமலின் பஞ்ச தந்திரத்தை வெளியிட கனடா, மலேஷிய மற்றும் வளைகுடா நாடுகள் தடை போட்டது நினைவிருக்கட்டும்.
சில புள்ளி விவரங்கள்!
சிவாஜியின் வெற்றி பிரமாண்டமானது. சொல்லப்போனால் சிவாஜியை தசாவதாரத்துடன் ஒப்பிடுவதே தவறு. ஆனால் அப்படி ஒரு ஒப்பீட்டை ரவிச்சந்திரன் தொடங்கி வைத்ததால் இங்கே சொல்கிறோம் (சிவாஜிக்கு கொடுத்ததை விட அட்லீஸ்ட் 1000 ரூபாயாவது மேலே போட்டுத் தாங்க என்று கலைஞர் டிவியிடம் கெஞ்சினாராம் இந்த ஏஸ்கரு!).
ï® சிவாஜி உலகமெங்கும் 800-க்கும் மேற்பட்ட திரையரங்குகளில் 50 நாட்களைத் தாண்டியது, நல்ல வசூலுடன்.
ï€ உலகெங்கும் 121 திரையரங்குகளில் 100-வது நாள் விழாவைக் கொண்டாடிய ஒரே இந்தியத் திரைப்படம் சிவாஜி மட்டுமாதான் (சிவாஜி தமிழ் 108 திரையரங்குகளில் 100 நாள், தெலுங்கு 13 திரையரங்குகள்).
வெளிநாடுகளில் ஓரிரு வாரங்களைத் தாண்டுவதே இந்தியத் திரைப்படங்களுக்கு பெரும் சிரமம். ஆனால் 16 வெளிநாட்டுத் திரையரங்குகளில் சிவாஜி 100 நாட்களைக் கடந்து ஓடியது.
மலேஷியா – 6 தியேட்டர்கள்
சிங்கப்பூர் – 2 தியேட்டர்கள்
அமெரிக்கா – சியாட்டில் சிட்டி
மஸ்கட் – ரூபி சினிமா
தென்னாப்பிரிக்கா – 2 தியேட்டர்கள்
கனடா – 2 தியேட்டர்கள்
இலங்கை – கொழும்பு மற்றும் யாழ்ப்பாணத்தில் 100 நாள்
சிவாஜி வெள்ளி விழாக் கொண்டாடிய திரையரங்குகள்:
சென்னை: பால அபிராமி – பகல் காட்சி (சென்னையில் 17 தியேட்டர்களில் ரிலீசாகியிருந்தது)
காஞ்சிபுரம்: பாபு – 4 காட்சிகள்
அம்பத்தூர்: ராக்கி – 4 காட்சிகள்
பெங்களூர் பிவிஆர் – 2 காட்சிகள்
ï€ மலேஷியாவில் சிவாஜியின் வசூல் சாதனை மகத்தானது. எட்டு வார கலெக்ஷன் மட்டும் 2,422,788 டாலர்கள். கிட்டத்தட்ட ரூ. 11 கோடியே 63 லட்சம்!
ஆனால் தசாவதாரம் வசூல் 7 கோடியே 80 லட்ச ரூபாய்தான்.
ï® பிரிட்டன் பாக்ஸ் ஆபீஸ் சரித்திரத்தில் முதல் 10 இடங்களுக்குள் இடம்பெற்ற ஒரே திரைப்படம் சிவாஜி மட்டுமே. முதல்வாரம் 9-ம் இடத்தில் இருந்தது சிவாஜி. பிரிட்டனில் மொத்தம் ஏழு வாரங்கள் ஓடியது சிவாஜி. மூன்றாவது வார முடிவில் சிவாஜியின் வசூல்: 5 கோடியே 74 லட்சம் ரூபாய்.
ஆனால் தசாவதாரம் டாப் டென் வரிசைக்குள்ளும் வரவில்லை. வசூலித்ததோ: 4 கோடி ரூபாய்தான், அதுவும் கடைசிநாள் தூக்கப்படும் வரையிலான வசூல்!
ï® மலேஷியா, சிங்கப்பூரில் சிவாஜியின் 100வது நாள் கொண்டாட்ட போஸ்டர்களை இங்கே தந்திருக்கிறோம்.
அத்துடன் உள்ளூரில் தசாவதாரம் 100-வது நாள் விழா கொண்டாடிய லட்சணத்தையும் கொடுத்துள்ளோம்...
இதுபோதும் தலைவரின் ரசிகர்களுக்கும், மற்றவர்களுக்கும் உள்ள வித்தியாசத்தைத் தெரிந்து கொள்ள!
பின்குறிப்பு : ரஜினியையும் ரஜினி படத்தையும் யாரோடும் ஒப்பிடுவது எங்களது நோக்கமல்ல. அதற்கு அவசியமுமில்லை. ரஜினியோடு ஒப்பிடுமளவுக்கு இங்கே தமிழ்நாட்டில் யாருமில்லை என்பதும் தெரிந்த விஷயம். தசாவதாரத்தின் வெற்றி, வேறு எந்த படத்துடனும் ஒப்பிடப்படாமல் சிவாஜியோடு ஒப்பிடுவது கடந்த 100 நாட்களாகவே தொடர்ந்து வந்தது. தொடர்ந்து நாங்களும் மௌனம் சாதித்தால் அது சம்மதம் என்கிற வகையில் எடுத்துக்கொள்ளப்படும் என்பதால் மட்டுமே இந்த கட்டுரை.
Sanganathan
for www.rajinifans.com
